Dening: Dodik Priyambada
Wis sawetara suwe aku ora ketemu karo mitra lawasku, yaiku mas Sugik. Umur-umurane ya sapantaran karo aku. Mas Sugik luwih enom sakithik tinimbang aku. Saelingku biyen pas dheweke isih SD ing kuthaku, dheweke sregep banget mbiyantu ibune, kulak endhog bebek minangka bahan kanggo nggawe endhog asin, menyang omahku, amarga bapakku ngingu bebek Alabio. Aku isih kelingan yen dheweke menyang omahku, katon kringete mruntus ing irunge, nanging praupane tetep sumringah nandangi pakaryan mau kanthi ati seneng. Miturutku, mas Sugik kuwi bekti banget marang ibune.
ADVERTISEMENT
SCROLL TO RESUME CONTENT
Ora ngira babar pisan, pas dina riyaya taun wingi, bapake mas Sugik jagongan karo bapakku, banjur aku diwenehi kartu namane mas Sugik dening bapake mas Sugik. Kanthi piweling supaya aku tansah bisa nyambung paseduluran karo mas Sugik. Aku dhewe ya rumangsa seneng, awit wis pirang-pirang puluh taun ora tau ketemu karo mas Sugik.
Sawijining dina, aku nyoba kirim email marang mas Sugik, lan alhamdulillah diwangsuli lan diwenehi nomer HP-ne. Sabanjure aku komunikasi karo dheweke liwat HP. Kurang luwih sawulan bacute, aku semayan arep ketemu karo mas Sugik, lan dheweke nawani piye yen aku dipapag sopire. Kanggo nggampangake nggonku tumuju kantore mas Sugik, mula aku ya sarujuk karo panemu kuwi.
Sawise ngliwati dalan-dalan kang rame, wusanane aku tekan ing bangunan gang gedhe lan apik, banjur aku mlebu njero kantor. Aku digenahake dening mas Satpam yen kantore pak Sugik ing lantai ndhuwur.
Mak jleg, lawang lift mbukak, banjur aku nyuwun pirsa marang mbak resepsionis yen aku arep ketemu mas Sugik. Aku diterake menyang ruwangane mas Sugik. Saklebatan katon yen kantor iki sawijining kantor kang resik, jembar tur apik.
Senajan wis puluhan taun ora kepethuk, tanpa wigah-wigih mas Sugik nampa tekaku kanthi renyah. Banjur, disambung omong-omongan lan crita ngalor ngidul, ngenani sejarah urip jaman biyen, dhek nalika padha isih cilik. Banjur sithik mbaka sithik, dheweke crita kepriye mula bukane mbukak usaha dhewe nganti saiki.
“Sawise aku leren teka salah sijine perusahaan, Mas. Aku nyoba mbukak usaha lan alhamdulillah, diparingi lancar dening Ingkan Maha Kuwasa. Kanggo nguwati krentege atiku, Mas. aku lunga kaji, saperlu nglakoni wajib lan nyuwun pituduh saka Gusti Allah, kepriye kudune anggonku lumaku sabanjure”, mangkono critane mas Sugik marang aku.
“Sasuwene aku ana tanah suci, Mas. aku rumangsa diparingi pituduh saka Gusti Allah menawa, aku kudu nerusake usahaku, supaya tambah ngrembaka lang migunani tumrap sapadha-padha.”, mas Sugik mbacutake anggone crita.
“Aku ora cilik ati, Mas, lan tansah rumangsa manteb anggonku nglakokake usaha iki, sebab aku nduweni keyakinan yen Komisarise perusahaan ora liya yaiku Gusti Allah. Aku iki mung saderma nglakokake miturut tuntunane Gusti Allah.”, ngono kandhane mas Sugik kanthi manteb. Mak dheg, atiku trenyuh lan nggumun, amarga ketitik menawa mas Sugik kuwi salah sawijining pengusaha taruna kang nduweni adeg-adeg kang jejeg, yen samubarang kuwi asale lan baline ya mung saka kersane Gusti Allah ta’ala. “Mulane Mas, waton sing takayahi bener, aku ora sumelang lan ora wedi, amarga perusahaanku iki sejatine komisarise yaiku Gusti Allah.”, mengkono dheweke nambahi tembunge.
Aku rumangsa anggonku silaturahim menyang kantore mas Sugik, akeh banget paedahe. Aku oleh tuladha becik saka dheweke kepriye bisa manggonake tauhid utawa kapercayan marang Gusti Kang Maha Tunggal, bisa tansah dadi sendhenan kanggo nglakoni urip, klebu nglakokake usaha.
Musholla kantore mas Sugik katon apik, resik lan jembar. Manggone ana ngarep cedhak resepsionis. Mas Sugik crita menawa nalika wiwitan nata ruwangan biyen, dheweke nduweni panjaluk marang sing ngawe rancangan, yen musholane kudu ana ngarep, lan kudu jembar tur apik. Aja nganti kalah apike tinimbang salah sijine ruwang, klebu ruwang kerjane mas Sugik dhewe. Subhanallah.
Sadurunge aku pamit bali, aku dijak mubeng–mubeng kantore kang pegawaine ora kurang saka 50 (seket) wong. Aku krasa marem bisa nyambung silaturahim karo mitraku lawas padha-padha asal kuthane, mas Sugik, mesisan bisa ngaji urip marang dheweke. Muga-muga isih akeh pengusaha kang tansah nengenake paugerane Gusti Allah kanggo nuntun anggone nglakokake usaha, kaya mas Sugik. Aamiin (*)
*) Dodik Priyambada, Penasihat Majelis Pendidikan Dasar dan Menengah & Pendidikan Non Formal (Dikdasmen-PNF) PDM Gresik, Penulis buku ‘Damar Ublik’, 2018.
Post Views: 2
